អតីតតារាចម្រៀងប្រុសប្រចាំផលិតកម្មសាន់ដេ លោក ខេមរៈ សិរីមន្ត ហាក់មានភាពមមាញឹកក្នុងវិថីសិល្បៈ និងទទួលបានភាពល្បីល្បាញជាខ្លាំងហើយនោះប៉ុន្តែបើមើលមកជីវិតឯកជនរបស់លោកវិញគឺលោកតែងលាក់បាំងនឹងព័ត៌មានថាលោកមានប្រពន្ធ និងកូនពីរនាក់ដែលការលាក់បាំងនេះវាខុសពីតារាសិល្បៈផ្សេងៗដែលទោះជាពួកគេល្បីទៅហើយប៉ុន្តែពួកគេពុំដែលលាក់បាំងពីដៃគូជីវិតឡើយ។
ស្រាប់តែថ្មីៗនេះមានប្រភពមួយបានឲ្យដឹងថាតារាចម្រៀងប្រចាំផលិតកម្មហង្សមាសរូបនេះ មានប្រពន្ធ និងកូនប្រុសស្រីពីរនាក់ រួចទៅហើយ បន្ទាប់ពីព្យាយាមលាក់បាំងការពិតអស់រយៈពេលជាច្រើនឆ្នាំរួចមក។ ប្រភពនោះបានប្រាប់សារព័ត៌មានក្នុងស្រុកថា«ការពិតលោក ខេមរៈ សិរីមន្ត និងភរិយា បានរៀបការជាមួយគ្នាស្ងាត់ៗ ក្នុងអំឡុង ឆ្នាំ ២០១២ ឬ ២០១៣ មកម្ល៉េះ ខណៈលោក ខេមរៈ សិរីមន្ត មិនបានអញ្ជើញភ្ញៀវ អ្នករួមអាជីពជាមួយគ្នាចូលរួមនោះទេ។ អ្វីដែលធ្វើឲ្យមានការសម្គាល់កាន់តែច្បាស់នោះ គឺ រូបថតរបស់ស្ត្រី ដែលគេអះអាងថា ភរិយារបស់លោក ខេមរៈ សិរីមន្តនោះ គឺថតក្នុងពេលទៅលេងស្រុកលោក សិរីមន្ត ដែលស្ថិតនៅ ភូមិតាម៉ូត ឃុំគរ ស្រុកព្រៃឈរ ខេត្តកំពង់ចាម ដោយរូបនេះ ភរិយារបស់លោក ឈរថតនៅមុខផ្ទះរបស់ឪពុកមា លោក សិរីមន្ត ដែលមានឈ្មោះថា ឈាន់ សុខម៉េង»។
ប្រភពបានបន្តថា «ភរិយារបស់ លោកខេមរៈ សិរីមន្ត ត្រូវបានគេដឹងថា ធ្លាប់បានធ្វើការជាមួយស្វាមី និងទៅណាមកណាជាមួយគ្នាជាញឹកញាប់ ខណៈភរិយារបស់លោក ជាកូនអ្នកមានធូរធាមកពីភ្នំពេញ មិនមែនមកពីខេត្តកំពង់ចាម ដូចដែលប្រភពមិនច្បាស់លើកឡើងនោះទេ។ ជាមួយគ្នានេះ ភរិយារបស់តារាប្រុសប្រចាំផលតិកម្មហង្សមាស លោក ខេមរៈ សិរីមន្ត រូបនេះ ត្រូវបានគេដឹងថា មានឈ្មោះ ផល្លី និងកូនប្រុសច្បងមានអាយុប្រមាណជាង ៥ឆ្នាំ មានឈ្មោះថា ខេមរៈ មន្តស្នេហ៍ ខណៈកូនស្រី មានអាយុជាង២ឆ្នាំ មានឈ្មោះថា ខេមរៈ ស្ត្រី»។
ជុំវិញរឿងរ៉ាវមួយនេះគេនៅពុំទាន់ឃើញក្រុមគ្រួសារ រួមទាំងសាម៉ីខ្លួនលោក ខេមរៈ សិរីមន្ត ចេញមុខបញ្ជាក់ ឬច្រានចោលយ៉ាងណានោះឡើយ ខណៈដំណឹងមួយនេះកំពុងតែបានចែកចាយស្ទើរតែពាសពេញសារព័ត៌មានក្នុងស្រុកទៅហើយ៕
No comments:
Post a Comment